أنا مش عايز أتجوز....
يا عالم أنا مش مهيأ نفسيا لفكرة الجواز . مش مستوعب فكرة إنى أصحى الصبح ألاقى كائن آخر جنبى فى السرير ومش متخيل نفسى باجرى بالبيجاما أجيب الفول والعيش لفطار العيال أو راجع البيت لافع تحت إيدى بطيخة أو كيس فاكهة وماشى ولا يوليوس قيصر وهو شايل خوذته تحت دراعه يا جماعة راحة البال مش بالساهل .ماأقبلش تحت أى ظرف من الظروف إنى أتنازل عن الأمن والإطمئنان إللى عايش فيه واجيب لنفسى القلق وأنام وأنا عينى مفتوحة خايف على الفلوس إللى فى جيب البنطلون . انا مرتاح كدة. ليه بقى أجيب إللى تشاركنى فى مواردى أو تحد منها وتستنزفها وأنا أصلا مواردى محدودة . ليه أجيب لنفسى وجع الدماغ وأرضى إن واحدة أياَ كانت تقف تملينى طلبات كأنى شغال عند إللى جابوها . ليه أعيش قى رعب وفوبيا يوم الخميس المنتشرة بين المتزوجين . أتجوز ليه أنا بقى حد عاقل يقولىّ سبب واحد يخلينى أتورط فى جوازة.
يقولولى إتجوز علشان اللقمة الحلوة والهدمة النضيفة والنومة الهادية
ياسلام .... على كدة الواحد يطلب إيد الشيف شربينى ولاّ يكتب كتابه على غسالة زانوسى أو يخطب مرتبة تاكى....
90%من بنات حواء معرفتهم بالطبيخ زى معرفتهم بعلم الفلك وال10% الباقيين بياكلوا أكتر من إللى بيطبخوه وبعدين جدتى كانت مريحانى من التلات هموم دول قصدى اللقمة والهدمة والنومة بس كانت بتحلم إنى أتجوز قبل ما تقابل وجه كريم لكن دة للأسف ماحصلش . كانت فكرتها عن عنوسة الولد ماتختلفش كتير عن عنوسة البنت دى حتى كانت بتشوفها أصعب لدرجة تخلى الناس تشك فى ذكورة عيلة بحالها علشان كدة كانت يوم بعد يوم تحاول تقنعنى بسبب جديد للجواز مرة تقول ياإبنى ولادك هايموتوا فى ضهرك إتجوز وهاتلك عيل إفرح بيه ومرة تانية تقول يا إبنى الدنيا كل يوم بتغلا والأسعار كل مادة فى الطالع وأسهم البورصة طالعة نازلة جايبة الخراب المستعجل للناس إتجوز النهاردة باللى معاك أحسن مابكرة تقل قيمته ومايسواش والناس تعطيك على قفاك ومرة تالتة تقول يا إبنى الأعمار بيد الله وإذا كنت عايشالك النهاردة مش هاعيشلك بكرة إتجوز وخلينى أفرح بيك قبل ما أموت ....
وكان أغرب سبب حاولت تقنعنى بيه لما قالت لى . يا إبنى مخدات البيت كلها إتقطعت وماعدش مخدة سليمة . إتجوز بقى وإرحمنى من نومتك الغريبة دى ....صراحة كنت قربت أقتنع بس إللى إستغربت له . إنها كانت تقول إتجوز ... إتجوز وعمرها ما رشحت ليا عروسة .. يمكن علشان ماتعرفش بالظبط مواصفات صاحبة النصيب فى إبن إبنها الحبيب ....